-Jonathan Lianhmingthanga
“Ka u, hei ka Mobile number hi Mami i lo pe dawn nia”, tiin U Awmpuii Chawlhni Chawhma Inkhawm bang, an In lam pana a haw chu ka auding a. A ni chu alo ding ve mai bawk a. Tichuan, a lo dinna lam chu ka va pan a. A ni chuan, “Mami chu nikum khan a thi tawh a sin!”, a ti ta mai! Ka nghingdawtin ka hria. Ka beisei hauh loh thil hria ka nih avangin ka hnuk a ulh titih a!
U Awmpuii chuan, “Ka zinlai a thi a nia. Kei pawh ka awmlo va. Ka lung a leng thei lutuk! An In bangah a thlalakte an tar a, ka thlir thrin a, Ka ngaitheiin, ka khua a har thei khawp mai! Kan Phone no hi la la, min rawn phone thin dawn nia”, a ti a. Tichuan, Students’ Union Committee zo hawlam ka nih avangin hmanhmawhlo tak chuan an In phone no chu ka laksak a, engmah sawi lemlo chuan kan in mangthra ta a.
Nia, Mami khan natna khirh tak mai TB(Tuberculosis) a vei a vangin hun engemaw chen chu Zemabawk TB Damdawi In-ah te a awm a. A chang leh mahni In lamah an inenkawl bawk a. Hun engemaw chen kan inhmuh tawhloh hnuin, ka beisei ngai hauhloh thil chu ka hre ta a ni! A damlaiin a nungchang a mawiin, a fel a, mi tihlawm a thiam a, a nui deuh reng bawk a, fiamthu a duh em em bawk. Chuvang chuan kei pawhin ka ngaina, a ni pawhin min ngamtlak a, kan inkawm ve fo thin. Mahse, chung thilte chu tuna chuan Piallei thuah-riat karah a lo thamral ta mai si! Aw, Mami tak kha aw!
Mami, a hmingpum Hmangaihthangi hi a nu leh pate hming chu sawi lo mai ila a thra zawk in ka ring. Venglaia khawsa an ni tih chauh hi ka sawi ang( A chhungten min lo hrethiam se, anni nen chuan kan inhriat lutuk loh avangin ka ziakthui vaklo vang). Mami nen hian Mary Jones Higher Secondary School-a Class-XI (Sc) ka zir laiin kan inchhar a. Canteen a chhungten an siam a, chu chu a damloh avanga School a chawltawh avangin a ngahpui thrin a. Chhun Break laite hian kan inkawm thrin a, kan infiam nasa thei hle. Kan inngamtlak em avangin kan Teacher te pawhin min chhaih fiam ve fo thin a. Kan Miss Estheri, D/o JH. Ramnghinglova phei chuan chhaih takah min neih a. Inngaizawng chiah lo mah ila, a nuam ve thei hle a nih kha..
Heng kan inhriat trantirh lai vel hian Vaivakawna ka pa u (Ka papuia) te Inah ka awm a. A remchan hun hunah min rawn phone thrin a, ka awmnate chuan min chhaih thrin nghe nghe. Nia, Mami nen khan inngaizawng chiah lo mah ila, kan rilru chuan kan inhaw lo ve ve a ni.
Vawikhat pawh Chawlhni-in Chaltlang-a a kal a ngai a, ‘Min kalpui rawh’ a tih a vangin ka kal pui a. A nin Chanmari kawnah min lo nghak a. Vaivakawn Zohnuai atngin ka han kal vang vang a, min lo nghak trang trang bawk a. Kan inhmu chu kan hlim hle. Tunah hian chhiartu duhtak, thlafam chang tawhhnu Mami chu ka mitthla-ah ka hmu fo a sin!
Tichuan, City Bus-ah kan chuang dun ta a. Kawr var lampang a ha a, puan a bih bawk a. Seat awl a awm vakloh avangin kan thrudun lo. Mahse, a inep chuan kan thu. Chaltlang dawrkawnah kan chhuk a, tichuan khami Chawlhni tlai, lung tichhetu tlai nita-ah khan kan pahnih khan vawikhat mah lengdun leh tawhlo turin kan inzui dun ve hnak hnak a nih kha!
Chutia Chawlhni-a kan lendun thu an lo hriat chuan kan Miss te chuan min chhaih nasa sauh va. Miss Mazawngi, Chanmari West-a mi pawh hian min chhaih ve fo thin.
Mami chenpui te chuan hetia kan inngainat leh kan lendun hi an hre hauh lovang. Vawikhat chu a nu leh pa awm laiin an Inah ka kal tawh nain, a nu leh pate nen chuan kan inhre zui vaklo.
Tichuan, zirna avangin Champhai lamah ka awm ta daih a. Class- XII ka zawh hnu chuan BCA zir turin Aizawl-ah ka lo chhuk leh a. Chuta ka thil tih hmasa ber pawl chu Mami va kan (Visit) a ni. Tichuan, Inriinni a ni a, Bazarah ka kal a, engemawtete ka leisak a, tichuan ka va kan ta nih kha. Amah chauhvin a lo awm a, a lo mu a. A lo nuamsam meuh lova, a lo dawldang hle. Mahse, hlim takin kan inkawm tho va, a nui tlawrh tlawrh a. Tichuan, ka thil leisak chhuanawmlo tak chu inthlahrung takin ka pe ta a nih kha! Ka thilleisak chu a hlut loh tehlul nen, mahse a lawm thiam hle. Thingpuite a lum a, thingpuite kan in a, ka hawsan leh ta a ni.
Tichuan, khami kum atang khan kum hnih vel zet chanchin kan inhre tawnlo vang vang a. Mahse, ka thinlungah a thi ngai lo. Hmulovin, tlawhpawh lemlo mah ila, ka thinlungah chuan rawn lanchhuah chang a neifo thin. Mahse, ka rinloh leh beisei miahlohvin Mami chuan mual min liamsan ta si!
Ka inngaihtuah lungchhiat chang chuan Mami boral ta hian ka lung a tichhia a. Mahse, tunah chuan Vanram-ah hlim takin, TB awm tawh lohna ramah, a mah siamtu bula awmin, hlim takin, Lei nun hreawm tak hi ngai hauhlovin a awm tawh ngei ang. Kei ngei pawh hian tuanh chuan Mami tana thuziak chauh ka ti thei ta si! Aw, a boral dawn te chuan min hrechhuak ve ngei awm si a! Aw, Mami….
Mami, i tan he ka thuziak hi ka hlan a, hlim takin, lei nun reng ngai tawh lovin, rorelna ni-a kan inhmuh hun tur nghakin min lo thlir reng dawn nia.
10:24 Chawhnu 21/10/2007
New Delhi-a Hockey World Cup khelh mekah nimin khan Germany chuan 5-2-a New Zealand hnehin Semi-Final an thleng ta a, Germany hi an champion thei a nih chuan a zawna title vawi 3 an lakna tur a ni dawn a ni.
21:40 
